Фестываль «Камяніца»
31.08.2018
Фестываль «Камяніца»
1 верасня 2018 года
з 12:00 да 22:00
У дзень мерапрыемства да 13:00 квіткі будуць прадавацца па папярэдніх коштах.
– У 2009 годзе, калі пачынаўся фестываль, мы разлічвалі на два-тры гады, але «Камяніца» дагэтуль жыве і з’яўляецца адной з галоўных пляцовак для тых, каго цікавіць культура Беларусі і суседніх краін. Мы запрашаем усіх на вялікае свята музыкі, творчасці і жывых традыцый, – кажа вядоўца фестывалю Алег Хаменка.
Агульны расклад
У 11:00 адчыняецца фестывальная пляцоўка, забавы і кропкі харчавання. У 12:00 стартуе інтэрактыўная сцэна «Традыцыя», дзе можна будзе заспяваць і патанчыць разам з выканаўцамі. У 14:30 – галоўная сцэна, дзе выступіць зорны склад беларускіх і замежных музыкаў. У 15:30 распачне працу сцэна ў царкве, дзе адбудзецца выступ вакальнага гурта «Мярэжа» і ўнікальны канцэрт майстроў колавай ліры – зараз рэдкага, але гістарычна аднаго з найбольш папулярных інструментаў на тэрыторыі сучаснай Беларусі на працягу некалькіх стагоддзяў. Таксама ўнутры кожнага помніка Вас сустрэне экскурсавод, які цікава і кампетэнтна распавядзе аб гісторыі той ці іншай пабудовы.
|
Інтэрактыўная сцэна
12:00 – 13:00 – фолк-гурт «Чарот», «Любанскія музыкі», этна-студыя Кetri, фолк-гурт «Гаманіна», праект «Спеўны сход» 13.00 – 13.50 – капэла «Коліснія», мужчынскі гурт «Кудмень» 13.50 – 14.20 / 15.10 – 15.25 – Палескія спевы: дуэт Еўдакіі Зіновіч і Фёдара Булыгі (Драгічынскі раён), гурт «Таняжанка» (Лельчыцкі раён) 16.10 – 16.35 / 17.20 – 17.45 – «Любанскія музыкі» і традыцыйныя танцы ад Сяргея Выскваркі 18.30 – 18.55 – Дударскі клуб 19.40 – 19.55 – Фолк-джэм
|
Галоўная сцэна
14:30 – 15:10 – гурт «Стары Ольса» 15:30 – 16:10 – Зміцер Вайцюшкевіч & WZ-Orkiestra 16:40 – 17:20 – Joryj Kloc (Украіна) 17:50 – 18:30 – этна-трыа «Троіца» 19:00 – 19:40 – гурт «Тесто» (Расія) 20:00 – 20:30 – Лявон Вольскі & Павел Аракелян 21:00 – 21:40 – гурт Trollwald
Сцэна ў царкве
15.30 – 16.00 – гурт «Мярэжа» 16.00 – 17.30 – канцэрт «Лірніцкі пагост»: Алесь Лось, Дзяніс Сухі, Алесь Чумакоў, Сяргей Чубрык, Каця Радзівілава, Васіль Грынь, Алесь Жукоўскі
|
Забавы і майстар-класы
З 11:00 на фестывалі гледачоў чакае вялікая зона забаў ад прасторы Quvalda: настольныя і электронныя гульні, манетны атракцыён, віртуальная рэальнасць, атракцыён з металашукачом. А таксама катанне на конях, лучны і арбалетны цір, «Бульбамёт» (беларускі «Кракадзіл»), футбольная зона ад ФК «Тарпеда Мінск» ды іншыя забавы. Каля фестывальнай пляцоўкі будзе вялікі кірмаш народных майстроў.
З 12:00 да 15:00 побач з інтэрактыўнай сцэнай будуць адбывацца майстар-класы па традыцыйных умельствах: пляценні пасталоў і прадзенні на кудзелі, выцінанцы і вырабе лялек-абярэгаў, выкарыстанні зёлкаў і прыгатаванні духмяных гарбатак.
Дзецям
Дзіцячая пляцоўка пачне сваю працу ў 11:00. Цэнтр «Крочым разам» прапануе актыўныя і настольныя гульні, творчыя майстэрні і зону для адпачынку, а таксама кірмаш дзіцячых вырабаў, дзе кожнае дзіця зможа размясціць і прадаць свае вырабы, зробленыя на фэсце.
У 13:00 маленькіх гледачоў чакае дзіцячы спектакль з элементамі батлейкі і інтэрактыву ад вандроўнага тэатрыка «Варгін». У 14:00 і 15:00 – дзіцячыя гульні, казкі і забавы ад Ларысы Рыжковай і гурта «Калыханка».
Немагчыма ўявіць сабе «Камяніцу» без снапоў сена, у якіх любяць бавіць час усе гледачы фестывалю. Дарэчы, кожны маленькі глядач на ўваходзе атрымае адмысловы папяровы бранзалет, на якім будзе напісаны тэлефон бацькоў.
Транспарт
Фестываль адбудзецца ў Музеі народнай архітэктуры і побыту ў вёсцы Азярцо – 4 кіламетры ад МКАД за аўтарынак «Малінаўка». Даехаць можна на асабістым аўто, ровары і аўтобусах.
Бясплатны фестывальны аўтобус будзе курсіраваць ад метро «Малінаўка» да музея і назад з 11:45 (першы ад «Малінаўкі») да 22:30 (апошні з музея). Акрамя таго «Мінсктранс» ладзіць дадатковыя рэйсы платных аўтобусаў №203Э праз прыпынак «Малінаўка».
Квіткі
Квіткі на «Камяніцу» ў папярэднім продажы і ў першую гадзіну фестывалю каштуюць: 15 рублёў (дарослыя), 7,5 рублёў (школьнікі). Пасля 13:00 1 верасня кошты складуць: 20 рублёў (дарослы) і 10 рублёў (школьнікі). Продаж на сайце і ў касах Kvitki.by. Інфалінія: (033) 661-14-32, (017) 209‑41-63. Гледачам у поўных версіях нацыянальных строяў (ад галаўных убораў да пасуючага абутку) – уваход бясплатны. Генеральны партнёр фестывалю – ААТ «Банк БелВЭБ».
Этна-трыа «Троіца» (Беларусь) на чале з Іванам Кірчуком не дарма называюць «шаманамі» – іх вытанчаныя апрацоўкі народных песень нясуць слухачоў далёка ў космас. Калектыў прадставіць на фестывалі свае лепшыя песні і шэраг кампазіцый з новага альбома «Цар-агонь», які выйдзе ў верасні.
Joryj Kloc (Украіна) – неардынарны гурт з Львова, стылістыку якога называюць «украінскім абрадавым хіп-хопам», «турба-фолкам» і «казацкім брэйкбітам». Дыскі калектыва выдаваліся ва Украіне і Польшчы, дзе музыкі актыўна канцэртуюць.
«Тесто» (Расія) – музычная фармацыя з Санкт-Пецярбурга, якая выконвае традыцыйныя фолк-напевы так, як іх чуе сучасны жыхар вялікага горада. У выніку атрымліваюцца танцавальныя кампазіцыі з выкарыстаннем жывых і электронных інструментаў, з адыходам у драм-н-бэйс і даб, фанк і хіп-хоп.
Беларускі дзяржаўны музей народнай архітэктуры і побыту
